सिद्धांत

क्षणोक्षणी कणकण जगण्याची धडपड
तुझीही -माझीही ..
ढासळते आहे माती , निखळतो आहे एकेक दगड..
हलक्याशा आघातानंही कोसळत आहेत आतल्याआत
मनाच्या ठिसूळ झालेल्या असंख्य भिंती..
पत्त्यांचे बंगले हलक्याशा झुळुकेने कोसळावेत,
तितक्या सहजपणे विखुरून जातोय कणनकण..
त्याच त्या अवशेषांवर कितींदा उभारायचं स्वतःचं अस्तित्व ?
आशांचे अंधुक कवडसे मावळून गेलेले
स्वप्नांचे फिनिक्स फार मागेच राखेत कायमचे दफन झालेले,
तरीही ही कोणती धुगधुगी घेऊन जगतो आहोत ,
समजत नाही.
डार्विनचा सिद्धांत कितींदा सिद्ध करतो आपण
जगण्याच्या धडपडीतून आणि ती शमतानाही ... !
- डॉ. सुनील अहिरराव