कैफ

हे पाहणे नि हासणे : हा प्रेमाचा खेळ आहे ,
की वासनांनी मनाशी घातलेला मेळ आहे?

खोल खोल रुतणारा कैफ उतू येत आहे,
मला माझ्या देहामध्ये चीणूनिया जात आहे.

कण कण छेदणारे हे प्रेमाचे तेज आहे,
की अंधार वेढणारे वासनेचे बीज आहे?

नाते तसे काही नाही, जोडताना 'ना'ही नाही
जोडूनही सारे काही, सोबतीला कुणी नाही...

नागिणीचे निश्वास हे श्वासामध्ये पेटलेले
अंगामध्ये जणू लक्ष निखारेही गोठलेले..

अंत याचा कळतो ना! कळूनही वळतो ना!
जाणीवाही संपताना कैफ मात्र ढळतो ना!

दूरदूर त्या तिथे उमटते सत्य आहे:
जीवनेही संपतात..इथे फक्त कैफ आहे!
                      डॉ. सुनील अहिरराव
           ( पूर्वप्रकाशित दै. गावकरी नाशिक दि. २०/०७/१९९४)